عشان ما تضيع قروشك في الكريم الغلط
بعد ما فهمنا إن جلدنا عبارة عن "حيطة" و"سيستم ري"، جا الوقت نعرف نحنا بنديهو شنو عشان نصلحه.
المشكلة إننا بنمشي الصيدلية أو السوق ونشتري أي "مرطب" والسلام، لكن الحقيقة العلمية بتقول إن المرطبات دي ما "حلة واحدة"، دي تلاتة عائلات كبيرة، كل عائلة عندها وظيفة محددة، ولو عرفتهم، حتقدر تفصل الروشتة المناسبة لجلدك وللجو العايش فيه.
العائلة الأولى: الشفاطة (Humectants) أول عائلة هي "المغناطيس" حق الموية. المواد دي زي الجلسرين (Glycerin)، واليوريا (Urea) بتركيز خفيف، وحمض الهيالورونيك (Hyaluronic Acid). ديل شغلتهم إنهم يشفطوا الموية من أي حتة يلقوها. في الغالب، بيسحبو الموية من الطبقات العميقة للجلد (من تحت) ويطلعوها للسطح عشان يرووا "الطوب" الناشف.
لكن هنا لازم ننتبه لنقطة خطيرة جداً، بالذات في جو السودان الجاف. المواد دي عندها ظاهرة اسمها "خداع الشفاطات" (Humectant Wicking). الجلسرين والهيالورونيك ديل "عطشانين" للموية، ولو الجو بره ناشف شديد (رطوبة أقل من ٨٠٪)، وما لقوا موية في الجو يشفطوها، حيقوموا يسحبوا الموية من أعماق جلدك ويخلوها تتبخر في الهواء!. يعني، لو استعملت سيروم هيالورونيك أو جلسرين براك في نهار جاف من غير ما تقفله بحاجة، إنت حرفياً بتنشف جلدك زيادة من جوه لبره.
العائلة الثانية: القافلة (Occlusives) وعشان نحل مشكلة التبخر دي، بنحتاج للعائلة الثانية، وهي "الحراس" أو العوازل. ديل مواد تقيلة ما بتدخل الموية ولا بتمرقها، شغلتهم يعملوا "غطاء" فوق الجلد عشان يحبسوا الرطوبة الجوة. على رأس القائمة دي بيجي "الفازلين" (Petrolatum)، وهو الملك المتوج لأنه بيمنع تبخر ٩٩٪ من الموية ، ومعاه الزيوت المعدنية (Mineral Oil).
وفي ثقافتنا السودانية، عندنا أقوى مثال للمواد القافلة دي وهو "الكركار" (أو الودك). دهان الكركار، المكون عادة من شمع عسل ودهون حيوانية وزيوت، بيشتغل كـ "درع عازل" تقيل (Heavy Barrier Shield). عشان كدا حبوباتنا كانوا بيستخدموهو زمان، لأنه في سخانة السودان والهواء الناشف، الترطيب الخفيف ما بينفع، لازم "طبقة عازلة" تحمي الموية من إنها تطير.
العائلة الثالثة: المنعمة (Emollients) آخر عائلة هي "السمكرية". لما الجلد ينشف، الخلايا (الطوب) بتكش وأطرافها بتطلع لبره، فالجلد بيبقى خشن وما بيلمع. هنا بتجي المواد المنعمة زي "زبدة الشيا" (Shea Butter) والسيراميد (Ceramides). ديل وظيفتهم يدخلوا بين الخلايا ويملا الفراغات والشقوق، فيخلوا السطح ناعم وأملس وبعكس الضوء (Radiance). زبدة الشيا بالذات ممتازة لأنها بتدي تغذية دهنية ونعومة، والسيراميد بيرجع يرمم "المونة" اللي اتكسرت.
الكريم المثالي هو اللي بيعرف يخلط بين العائلات دي بذكاء. ١. شفاطة (زي القلسرين) عشان تجيب الموية. ٢. منعمة (زي الشيا) عشان تنعم السطح. ٣. قافلة (زي الفازلين أو الكركار) عشان تحبس الخير ده كله وما تخليه يطير في السخانة.
المرة الجاية حنتعلم كيف نقرأ المكونات دي في أي علبة ونعرف هل الكريم ده "مايل" للترطيب المائي ولا الدهني؟ (حاجة بنسميها الـ Bias) عشان تعرف تختار صاح.
#عيادة_الجلدية_أون_لاين
#عيادات_بيت_العافية
#أسرار_الترطيب
تلغرام العياة الاون لاين
@Byt_Alafya