نستعمل الصمغ العربي لمدة قدر شنو؟
الجواب:
الحقيقة الموضوع ما عندو رقم واحد بناسب كل الناس، لأنو تأثيرو ما بيجي فجأة، داير زمن عشان يغيّر وضع المصران والميكروبيوم بالراحة.
الزول العايز بس يرتّب هضمو، يقلّل النفاخات، أو ينظّم حركتو، غالباً ببدأ يحس الفرق بعد أسبوعين، لكن الفايدة الراسخة بتبدأ بعد ستة إلى تمانية أسابيع من الاستخدام المستمر.
ولو الهدف متعلق بالسكر والدهون والالتهاب الخفيف الحاصل مع السمنة، الدراسات بتوري إنو الجسم بحتاج من شهرين لحدي تلاتة شهور عشان التغييرات تحصل بوضوح. الميكروبيوم ذاته، البكتيريا النافعة البنبني عليها الفايدة، بتتغيّر ببطء، وأي تعديل حقيقي في توازنها داير قرابة تلاتة شهور من الاستخدام المنتظم.
في ناس بتستعملو للقولون العصبي أو التعب المتعلق بالهضم، والمدة المناسبة هنا من ستة لحدي اتناشر أسبوع قبل ما نحكم فعلاً إنو نفع ولا لا.
الأهم من دا كلو إنو الصمغ آمن للاستخدام الطويل، وما معروف عنو ضرر لو الزول داوم عليه شهور طويلة. كتير من الناس لمن يشوفوا التحسن بخلوهو جزء ثابت من روتينهم بجرعة عشرة أو عشرين جرام يومياً.
الخلاصة إنو تجربتو محتاجة صبر شوية. خلوهو معاكم على الأقل شهرين، وبعدها حتبدو تشوفو الاختلاف الحقيقي. ولو لقيتوهو مناسب، ما في مانع تستمرو عليه لفترة أطول بدون أي مشكلة.
#عيادات_بيت_العافية
#عيادة_الجلدية_أون_لاين