وصلنا للمحطة الأخيرة في سلسلتنا، وختامها لازم يكون نصيحة غالية عشان ما نكون بنبني بيد ونهدم باليد التانية، في غلطتين كبار ومنتشرين شديد في بيوتنا بنعملهم بحسن نية، لكنهم في الحقيقة "نار" تحت الرماد وممكن يدخلوا الطفل في متاهات صحية كبيرة نحنا في غنى عنها.
الغلطة الأولى هي "البدرة"، علبة البودرة دي زمان كانت أساسية في "شنطة الولادة"، والناس بتكبكب فيها عشان تنشف المنطقة، لكن الطب الحديث قال كلمته: "وقفوا البدرة فوراً"، لسببين أخطر من بعض
الأول إنو ذرات البدرة دي ناعمة شديد وبتطير في الجو، والطفل بيستنشقها بسهولة، وممكن تعمل ليهو مشاكل في الرئة والتهاب رئوي كيميائي ومشاكل تنفسية هو ما ناقصها
والسبب التاني إنو لو البدرة دي معمولة من "النشا"، فالنشا ده عبارة عن "سكر"، وفي جو الحفاض الرطب والدافيء ده بيعتبر "وجبة دسمة" للفطريات، يعني كأنك بيدك بتقدم أكل للكانديدا وبتقول ليها اتفضلي اكبري وانتشري.
الغلطة التانية والأخطر هي "الكريمات السحرية"، وأقصد بيها كريمات الكورتيزون القوية زي (الديرموفيت والبيتنوفت) ، الأم بتشوف التسلخ وبتقول "أعمل مسحة خفيفة عشان يروق بسرعة"، والحقيقة إنو فعلاً بيروق في البداية، لكن دي خدعة
لأن منطقة الحفاض دي "منطقة مقفولة"، والحفاض بيشتغل كأنه "لصقة طبية" بتخلي الجلد "يشرب" الدواء بزيادة 100 مرة عن الطبيعي ، والامتصاص العالي ده للكورتيزون القوي بيمشي طوالي للدم وممكن يعمل للطفل مشاكل في الهرمونات والغدد ومتلازمة "كوشينج" (وش القمر)
ده غير إنو بيرقق الجلد وبيعمل فيهو تشققات وعلامات ما بتروح ، عشان كدة الكورتيزون في المنطقة دي "ممنوع" إلا بوصفة دكتور ولأنواع خفيفة جداً ولفترة قصيرة، خليكم مع الزنك والفازلين هم الأمان والضمان.
وبكده نكون قفلنا ملف التسلخات، نتمنى تكونوا استفدتوا وربنا يحفظ أطفالكم من كل شر
#عيادات_بيت_العافية #عيادة_الجلدية_أون_لاين