بعد ما عرفنا في البوست الفات إنو المؤشر السكري (GI) هو المقياس الحقيقي لسرعة دخول سكر الأكله للدم بغض النظر عن كونها "بسيطة" ولا "معقدة"، الناس بدت تطبق المفهوم ده بحماس، لكن سرعان ما اصطدموا بنتائج "مُحيّرة" خلت الكثيرين يشككوا في القصة كلها، وأشهر مثال للمعارضة دي كان سؤال "البطيخ".
البطيخ لو جينا شفناه بمقياس المؤشر السكري بنلقاه عالي جداً (70) ، يعني السكر الفيهو بيوصل الدم بسرعة الصاروخ، وده خلى ناس كتيرة تفتكر إنو البطيخ ده "ممنوع" زيه زي السكر، لكن الحقيقة الفسيولوجية كانت غير كدة تماماً، والسبب بيرجع لطريقة حساب المؤشر ده ذاته.
المؤشر السكري (GI) عشان يتحسب في المعمل، العلماء لازم يأكلوا المتطوع 50 جرام "كربوهيدرات صافية" من الصنف المحدد ، وعشان تلم ليك 50 جرام كربوهيدرات من البطيخ، إنت محتاج تاكل كمية ضخمة جداً لأنو البطيخ أغلبه موية ، فالمؤشر السكري هنا بيوصف ليك "سرعة" السكر لو توفرت الكمية دي، لكنه ما بيراعي الكمية الحقيقية البتاكلها إنت في القعدة العادية.
عشان كدة ظهرت الحاجة لمقياس أكثر عدالة وإنصافاً سموه "الحمل السكري" (Glycemic Load) ، وده ببساطة الميزان اللي بيجمع ليك بين الأمرين؛ بيشوف سرعة الأكلة (الـ GI) وبيضربها في كمية الكربوهيدرات الحقيقية الموجودة في الوجبة ، يعني بيوريك سرعة "السكر" وكمان كميته.
لما نطبق المقياس الجديد ده على البطيخ، بنلقى إنو رغم سرعته العالية (مؤشر عالي)، إلا إنو حمله السكري منخفض جداً ، لأنو كمية السكر الفعلية المذابة في الموية الفي البطيخ بسيطة، فما بيعمل إرهاق حقيقي للبنكرياس، وعكسه تماماً لو مسكنا طبق كبير من المكرونة أو الرز، ممكن يكون مؤشرهم السكري متوسط (55)، لكن لأنهم "مركزين" ومليانين نشا، حملهم السكري بيكون عالي جداً وضغطهم على الأنسولين كبير.
الفهم ده ريحنا كتير وخلى الصورة أوضح، إنو العبرة ما بس بالنوع والسرعة، العبرة بالكمية والعبء الكلي على الجسم ، لكن، هل الحمل السكري ده براهو كفاية عشان أحكم إنو الأكلة دي "بترفع السكر بتاعي" أنا بالذات؟
لكن العلم في السنوات الأخيرة فجر مفاجأة أكبر بكتير، وورانا إنو كل الأرقام والجداول دي ممكن تطلع غلط لما الموضوع يتعلق بجسمك إنت تحديداً، وكيف إنو نفس قطعة العيش أو البطيخ، ممكن زول سكره يضرب السما بسببها، وزول تاني ياكلها وسكريهو ما يتحرك إلا حاجة بسيطة.
ده بقى اللغز الأكبر اللي حنحكيه في البوست الجاي، وحنكتشف مع بعض ليه أجسامنا بتختلف الاختلاف المدهش ده
#عيادات_بيت_العافية #عيادة_الجلدية_أون_لاين