بعد ما عرفنا في البوست الفات إنو أجسامنا بتختلف، وإنو البكتيريا والساعة البيولوجية هم اللي بيسوقوا الدفة، السؤال المهم اللي بيطرح نفسه: هل معناه نستسلم ونقول "خلاص الجسم ده وحظه"؟ الإجابة لا طبعاً، العلم زي ما كشف لينا المشكلة، أدانا "مفاتيح" وحيل ذكية جداً نقدر بيها ننظم الجسم، ونخلي الأكل النشوي يدخل الدم بتهذيب واحترام، بدل ما يدخل "مداهمة".
طريقة "تقديم" الأكل للجسم أهم بكتير من الأكل ذاته، وأول حيلة ذكية هي حيلة "الترتيب"، أو زي ما بنسميها "الإتيكيت الفسيولوجي"، ومعناها ببساطة إنك ما تبدأ بالنشويات أبداً، يعني لو ختيت قدامك صحن فيه رز ولحمة وسلطة، أكبر غلطة تعملها إنك تمد يدك على الرز أول، الدراسات أثبتت إنك لو أكلت الخضار والألياف والبروتين أول، وانتظرت مسافة بسيطة (10 لـ 15 دقيقة) قبل ما تاكل النشويات، الحركة دي براها كفيلة إنها تقلل ارتفاع السكر بعد الأكل بنسبة بتوصل لـ 30-40% مقارنة بإنك لو أكلتهم مخلوطين أو بديت بالنشويات.
السر هنا إن الألياف والبروتين بيعملوا زي "فرشة" أو بطانة للمعدة، وبيخلوها تفرز هرمونات (زي GLP-1) بتبطئ تفريغ المعدة، فبمجرد ما الرز يوصل، بيلقى الجسم جاهز ومستعد، والامتصاص بيتم ببطء شديد بدل ما يحصل طوفان سكر مفاجئ.
الحيلة التانية أغرب وأعجب، وممكن نسميها "سحر المطبخ"، وهي إنك تبرد النشويات، تخيلوا إن البطاطس أو المكرونة لما تطبخها وتخليها تبرد، تركيبتها الكيميائية بتتغير تماماً، النشا بيتحول لحاجة اسمها "نشا مقاوم" (Resistant Starch Type 3)، يعني جزيئات النشا بتعيد ترتيب نفسها وبتبقى قوية وصعبة الهضم ، والنتيجة إنها بتعدي من الأمعاء الدقيقة من غير ما تتحول لسكر كامل، وبتمشي للأمعاء الغليظة عشان تتغذى عليها البكتيريا النافعة، يعني ضربت عصفورين بحجر: قللت السكر، وغذيت بكتيريتك الصالحة.
الحيلة التالتة هي "احترام الهيكل"، ودي بنقصد بيها إنك تاكل الحاجة "بكامل هيئتها" وتبعد من العصير والطحن المبالغ فيه، لأنو في الحبوب الكاملة والبقوليات، النشا بيكون "محبوس" جوة جدران خلوية قوية بتعمل حاجز طبيعي ضد الإنزيمات الهاضمة ، لكن مجرد ما تعصر الفاكهة أو تطحن الحبوب ناعم شديد، إنت كسرت الأسوار دي وقدمت السكر للدم في طبق من ذهب.
لسه في "سر كبير" موجود في خزاين مطابخنا، مواد رخيصة ومتوفرة، واكتشفوا إنها بتشتغل شغل أدوية السكر الغالية في تثبيت المؤشر السكري، وبقينا فاهمين طريقة تأثيرهم كيف وليه، ده اللي حيكون موضوع ونستنا الجاية بكره إن شاء الله
#عيادات_بيت_العافية #عيادة_الجلدية_أون_لاين