"يا دكتور، أنا باكل عيش من الفرن عادي، المشكلة وين؟"
زمان حبوباتنا كانوا بيعوسوا الكسرة أو يعجنوا العيش في البيت: دقيق، موية، خميرة، وملح. انتهى الموضوع. لكن الليلة، لو مسكت أي كيس "دقيق جاهز" أو "كيك" أو حتى "آيسكريم" من الدكان وقريت المكونات ورا، حتلقى لستة طويلة عريضة من مواد كيميائية أسماؤها غريبة.
المواد دي هي "الخباز الخائن" القاصدنو. الليلة حنشرح كيف المواد دي بتخرب "سور الصين العظيم" الجوه بطنك، وبتخلي مناعتك تضربك.
سور الحماية العظيم (أمعائك)
عشان نفهم الحاصل، تخيل أمعائك دي عبارة عن أنبوب طويل. الأنبوب ده مبطن من جوة بطبقة رقيقة جداً من الخلايا، وظيفتها زي "حرس الحدود": تسمح للحاجات المفيدة بس (الفيتامينات والأكل المهضوم) إنها تدخل الدم، وتمنع الحاجات الضارة (البكتيريا، السموم، وفضلات الأكل) إنها تمر. الخلايا دي ملصقة مع بعض بـ "غراء" قوي جداً اسمه (Tight Junctions) أو "الوصلات المحكمة"، عشان مافي أي حاجة تتسرب بيناتهم.
الجريمة: "صابون" في الأكل!
المصانع الحديثة عشان تخلي العيش يقعد فترة طويلة ويكون "هش وطري"، وعشان الآيسكريم يكون ناعم وما يسيح بسرعة، بتضيف مواد اسمها "المحلبات" (Emulsifiers) زي مادة (Polysorbate-80) ومادة (CMC). المواد دي بتشتغل في الأمعاء زي "صابون الغسيل" أو المنظفات بالضبط.
تخيل إنك كبيت صابون في أمعائك:
أول حاجة، الصابون ده بياكل طبقة "المخاط" اللزجة البتحمي جدار الأمعاء .بعدين، بيذوب "الغراء" الماسك الخلايا مع بعض. كده السور بيقع، وبتحصل المصيبة الكبيرة: "تسرب الأمعاء" (Leaky Gut).
لما العدو يدخل "الصالون"
لما الجدار ده يحصل فيه ثقوب، الحاجات الكانت مفروض تطلع مع الفضلات (بكتيريا، سموم، بقايا غلوتين) بتدخل فجأة لداخل مجرى الدم. هنا "حرس الحدود" (الجهاز المناعي) بيضرب جرس الإنذار: "يا جماعة في دخلاء جوة الدم!". الجهاز المناعي بيبدأ يضرب في كل الاتجاهات، وبتحصل حالة "التهاب شامل" في الجسم. ومن كثرة اللخمة والضرب، المناعة بتفقد تمييزها وبتبدأ تضرب أنسجة الجسم نفسه.
يعني، السندوتش "المحسن" الأكلته ده، ممكن يكون هو السبب إنو مناعتك هائجة على مفاصلك أو جلدك، لأنو ببساطة فتح الباب للعدو يدخل.
مش بس الأكل.. حتى "العدة"!
الموضوع ما واقف على الأكل بس. الدراسات الجديدة بتقول إنو حتى بقايا الصابون في المواعين (لو ما اتغسلت كويس) واللدائن الدقيقة (Microplastics) ممكن تعمل نفس التأثير وتكسر حواجز الأمعاء.
ده كل موضوع الأكل يعني؟
طيب، لو وقفنا المحسنات.. هل كدة انتهت المشكلة؟ للأسف لسه.. في "متهم أبيض" تاني بنحبه شديد وبنختو في كل أكلنا، وقاعد يخلي خلايانا المناعية "شرسة" وعدوانية.
البوست القادم :السم الأبيض.. أكلنا الحديث ملح زيادة وألياف ناقصة. (حنتكلم عن كيف الملح بيقلب المناعة ضدنا، وكيف بنجوع البكتيريا النافعة)
#عيادات_بيت_العافية #عيادة_الجلدية_أون_لاين #المناعة_الذاتية
الفهرس
https://www.facebook.com/share/p/17cXVNnMF5/