"يا دكتور، ليه العيادة كلها نسوان؟ الرجال ديل ما بيمرضوا ولا شنو؟"
ده السؤال اللي بيخلي أي زول يدخل عيادة روماتيزم أو غدد يحتار، الحقيقة الما بنقدر نغطيها إنو النساء بيمثلوا حوالي 80% من مرضى المناعة الذاتية
يعني من كل 10 مرضى، في 8 نساء ورجلين بس. النسبة دي ما صدفة، ولا لأنو النساء "شكايات" زي ما بعض الرجال بيحبوا يلمحوا، القصة وراها سر بيولوجي عظيم ليه علاقة بأعظم وظيفة في الوجود: "الحمل والأمومة".
عشان نفهم الحكاية، لازم نعاين لجسم المرأة كـ "معجزة هندسية"، المرأة هي الكائن الوحيد القادر إنه يشيل بداخله "كائن تاني" (الجنين) لمدة تسعة شهور كاملة. طبياً، الجنين ده نص جيناته من الأب، يعني بالنسبة لجهاز المناعة هو "جسم غريب" زي زراعة الكلى أو القلب، وكان المفروض المناعة ترفضه وتطرده فوراً، لكن سبحان الله، عشان البشرية تستمر، جهاز مناعة المرأة مصمم بطريقة فريدة جداً بتجمع بين النقيضين: "قوة رهيبة" و"هدوء حذر".
الجهاز ده مصمم إنه يكون "شرس جداً" ومتحفز أكتر من الرجال عشان يحمي الأم والجنين من أي ميكروب، لكن في نفس الوقت، مصمم إنه "يهدأ" ويرخي دفاعاته لما تجي إشارات الحمل والهرمونات المصاحبة ليهو. يعني جسم المرأة مبرمج على إنه يعيش فترات طويلة تحت تأثير "مهدئات الحمل والرضاعة"، وده كان حال حبوباتنا زمان، الواحدة كانت بتقضي جزء كبير من شبابها إما حامل أو بترضع، فجهازها المناعي الشرس كان بيلقى "الفرامل" الطبيعية دي بتهديه.
المشكلة الليلة إن نمط حياتنا اتغير تماماً، البنات بقوا يتزوجوا متأخر، وعدد الأطفال قل، وفترات الرضاعة قصرت. هنا بيحصل "سوء التفاهم" الكبير: جهاز المناعة القوي والمتحفز "منتظر" إشارات التهدئة المعتادة (الحمل والولادة المتكررة) عشان يروق، ولما ما يلقاها، بيفضل في حالة "هيجان" واستنفار دائم، وبدل ما يحمي الجسم، طاقته الزايدة دي بترتد عليه وتبدأ تهاجم الغدة الدرقية أو المفاصل. يعني ببساطة، القوة اللي ربنا اداها للمرأة عشان تحمي الذرية، في غياب الذرية الكثيرة بتتحول لنقطة ضعف.
وفوق ده كله، في سبب جيني كمان. النساء عندهم كروموسوم (X) نسختين (XX)، بينما الرجال عندهم نسخة واحدة (XY). الكروموسوم (X) ده مليان جينات مناعية. وجود نسختين عند المرأة بيخليها أقوى بكتير في مقاومة الالتهابات والفيروسات من الرجل (عشان كدة الرجال بيتجرسوا من الإنفلونزا)، لكن "الجرعة الزايدة" دي من المناعة هي نفسها البتخلي احتمال الخطأ وارد، وتخلي المناعة تضرب الجسم بالغلط.
القصة ما "عقاب"، دي "ضريبة" القوة البيولوجية وضريبة القدرة على خلق الحياة. جسم المرأة دقيق وحساس، وأي تغيير في نمط الحياة بيأثر فيهو أكتر من الرجل.
كدة نكون لفينا لفة كاملة، من تاريخ أجدادنا، لأكلنا، لنومنا، لحدي جيناتنا. فضل لينا نعرف الزبدة: بعد ما فهمنا ده كله، الحل شنو؟ وكيف نقدر نعيش بسلام مع جهازنا المناعي في الزمن الصعب ده؟
البوست العاشر والأخير: الحل شنو؟ (روشتة العودة للطبيعة).
#عيادات_بيت_العافية #عيادة_الجلدية_أون_لاين #المناعة_الذاتية
الفهرس
https://www.facebook.com/share/p/17cXVNnMF5/