للمهتمين من الاطباء الصغار بالتخصص فيها
سؤال متكرر حأدون بعض الخواطر في إجابتو حول طريقتي للدرس، وقد تنفع لباقي التخصصات
أول حاجه الفكرة ما في المراجع الجيدة بتاتا، وانا ما حصل قريت لي مرجع من الغلاف للغلاف لسه 🙈
الخطوة الأولى في نظري هي انك تدرس العلوم الاساسية شديدة التعلق بالتخصص بدقة، وفي حالة الجلدية بيعني انك تعرف كويس:
- علم المناعة Immunology
- علم الأمراض العام General Pathology ثم علم أمراض الجلدية Dermatopathology بالذات أنماط الامراضية الأساسية زي ال spongiosis وال interface dermatitis إلخ
- علم الخلايا histology وتركيب الجلد على المستوى الخلوي والجزيئي
- علم الاحصاء الطبي وتقييم الأبحاث وفهم طريقة عمل العلوم ودرجات الأدلة والطب المبني على الأدلة
الخطوة التانية هي معرفة :
- الابجدية بتاعت امراض الجلد ممثلة في الأشكال الأساسية للطفح primary lesions ومشتقاتها وتعريفها وعلاقتها بالتركيب الخلوي والباثولوجي بحيث تقدر تشوف الامراضية عبر المنظر البره
- معرفة التقسيمات الأساسية لعوائل الأمراض الجلدية والنمط الأساسي prototype لكل عائلة زي الاكزيما والصدفية والامراض الفقاعية إلخ
- تقدير أهمية التاريخ المرضي ومعرفة الأسباب البيئية للأمراض وتوزيعها العمري والجغرافي إلخ
الخطوة الثالثة هي التدرب عبر التعلم من خبير apprenticeship لان لا غنى عنها في الجلدية عشان تكتسب صنعة التشخيص، من غيرها عينك ما حتقدر تميز بين الأشكال المتشابهه وعقلك ما حيعرف يسأل شنو عشان يفرق من بين ال ٣ آلاف مرض جلدي المعروفات حتى الآن!
الخطوة الأخيرة بالنسبة لي هي:
دراسة الأمراض عبر التشخيص التفريقي للمظاهر المشهورة للأمراض، مثلا مظهر (حبوب في الوجه) أو (نقص أو زيادة التصبغات) أو (فقاعات بالجلد) أو (طفح مع حمى) إلخ، لأن ده بعلمك تذاكر الامراض عبر المظاهر السريرية بدل تحفظ الامراض حسب ترتيبها المنظم بالمراجع اللي ما بيعكس صعوبة تفريقها لما تكون بتدي نفس المظاهر وهي من عوائل مختلفة جدا، وهنا بتكون كتب التشخيص التفريقي هي بمثابة الموجه ليك عشان ترجع للمراجع لتزيد معرفتك بالأمراض المختلفة ومظاهرها، ويا حبذا لو كان ده مدفوع بحالات واقعية بتشوفها بحيث تلصق المعلومة في راسك لإرتباطها بالممارسة وتتأكد من انك استهلكت كل الممكنات التشخيصية
والحاجه الاهم هنا هي عدم الاعتماد على المراجع فقط وإنما تتبع المراجعات الحديثة systematic reviews حول الأمراض ومعرفة الخلافات والاتفاقات حول تشخيصها وعلاجها والتدرب على القراءة النقدية للمعلومات الطبية بإستمرار
وأخيرا تتبع الحالات المنشورة بإستمرار بالمجلات العالمية والمواقع الطبية، ونقاشها مع الاقران، ومشاركة الخبرات والحالات بإستمرار (نصف معرفتك عند اخيك)
ومن بعدها بجي التفاوت المتعلق بحب التخصص والانتباه للتفاصيل، وما بنسى خالص الدرس الادانا ليهو استاذي عليهو رحمة الله د محمود عبدالله الوقف مسافة يفحص حالة نخالة وردية Pityriasis rosea في عيادة الجلدية بالمستشفى أول ايام تخصصنا وهي تعتبر من الامراض اللي بتتعرف في ثانية للمتخصص وهو كان بمارس الجلدية لأطول من اعمارنا (كان فوق الثمانين وقتها) واتلفت قال لينا: كل حالة مختلفة عن التانية، عاينو كويس لشكل الطفح والقشور واي تفصيله فيهو عشان تزيدوا خبرتكم وما تتجاوزوا المألوف عشان تقدروا تعرفوا النادر والمختلف
ده بإختصار ما عنّ لي كتابته عن السؤال المتكرر 😅