في رُضّع كتار، خصوصاً الطفل الممتلئ أو البلعّب كتير، الأم بتلاحظ إنو ثنيات الرقبة بقت حمراء أو غامقة، ورطبة، وفيها ريحة، وأحياناً الجلد فيها متسلخ وبوجع الطفل لمن نفتح الرقبة أو ننضفها، كتير من الأهل بفتكروها حساسية أو التهاب خطير، والحقيقة إنها بتبدأ من حاجة بسيطة جداً، وهي الرطوبة المحبوسة جوه الثنيات
رقبة الرضيع بتتميز بثنيات عميقة، وبتتجمع فيها سوائل زي اللبن البيرجع من الفم، واللعاب، والعرق، وبقايا الكريمات أو الزيوت، تجمع السوائل دي مع قلة التهوية والاحتكاك المستمر بين الجلد والجلد بضعف الحاجز الجلدي، وبيظهر التسلخ أو التهاب الثنيات المعروف باسم Intertrigo
في البداية بيكون الجلد رطب أو لامع، وملمسو ناعم زيادة أو متسلخ، ومصحوب بريحة بسيطة، في البشرة الفاتحة بيظهر أحمر واضح، وفي بشرة أطفالنا الداكنة بظهر غامق أو بنفسجي أو بني، أو كجلد لامع ومؤلم مع غياب الحمرة الواضحة، عشان كده بنركز على استجابة الطفل؛ لو بيكي مع التنظيف أو فتح الثنية، فده التهاب صريح حتى لو اللون الواضح غايب
العلاج الأساسي بيعتمد على التجفيف والتهوية والابتعاد عن الكريمات الكثيرة، بنغسل المكان بلطف بموية فاترة أو نمسحو بقطنة مبلولة، وننشف بالطبطبة كويس جداً، ونفتح الثنيات شوية عشان نسمح بدخول الهواء، خصوصاً بعد الرضاعة وبعد الاستحمام، كمان ممكن نخت طبقة خفيفة جداً من كريم حاجز زي zinc oxide أو فازلين في حالة وجود احتكاك، مع الحرص على تجنب تكديس الكريمات الكثيفة جوه الثنية لأنها بتحبس الرطوبة أكتر
لو التسلخ بقى لامع ورطب شديد، أو دخلت فيهو حبوب صغيرة حوالينو، أو استمر رغم التجفيف والتهوية، بنفكر طوالي في فطريات الكانديدا، خصوصاً لو الطفل عندو فطريات في الفم، أو بياخد كورس مضاد حيوي، أو بعاني من تسلخات في منطقة الحفاض، في الحالة دي بحتاج الطفل مضاد فطري موضعي مناسب يوصفه الطبيب مع الاستمرار في خطوات التجفيف
في ممارسات شائعة بتزيد المشكلة، وبنوصي بتجنبها تماماً، منها استخدام الزيوت التقيلة جوه الثنيات، والعطور، والمناديل المعطرة، والفرك الشديد، الأطباء بنصحوا كمان بالابتعاد التام عن استخدام البودرة، لأنها بتشكل خطر استنشاق على رئة الطفل، ولأنها بتتحول لكتل مع الرطوبة وبتزيد من الاحتكاك والتهيج بدل ما تخففه، بنبتعد كمان عن الكريمات المركبة العشوائية، خصوصاً البتحتوي على الكورتيزون القوي، لأنها بترقق جلد الرضيع وبتخبي العدوى وبتسمح للفطريات تنشط أكتر
في البوست الجاي حنتكلم عن الحالات البتتطلب الطوارئ فوراً عشان نعرف نفرقها من الحالات البسيطة الفاتت